कर्णाली प्रदेश सरकारले आफ्नो सय दिनको अवधिमा विभिन्न क्षेत्रमा काम गरेको विवरण सार्वजनिक गरे पनि विकास बजेट कार्यान्वयनको अवस्था भने निराशाजनक देखिएको छ । चालु आर्थिक वर्षको असोज मसान्तसम्म प्रदेश सरकारको पुँजीगत बजेट खर्च तीन दशमलव ९३ प्रतिशतमा सीमित भएको छ ।

मुख्यमन्त्री मंगलबहादुर शाहीले आइतबार आफ्नो नेतृत्वको सरकारका सय दिनका उपलब्धि सार्वजनिक गर्दै कानुन निर्माण, प्रशासनिक सुधार, पूर्वाधार विकास, शिक्षा, स्वास्थ्य र विपद् व्यवस्थापनका क्षेत्रमा भएका कामको विवरण प्रस्तुत गर्नुभएको हो ।

सरकारले सय दिनको अवधिमा चारवटा नयाँ विधेयक र दलित समुदायको सशक्तीकरण तथा जीवनस्तर प्रवर्द्धनसम्बन्धी पहिलो संशोधन विधेयक गरी पाँचवटा विधेयक प्रदेशसभामा पेस गर्न मन्त्रिपरिषद्बाट स्वीकृति दिएको जनाएको छ । योगदानमा आधारित निवृत्तिभरण कोष, सामयिक राजस्व सङ्कलन, खानेपानी तथा सरसफाइ र स्याउ विकास बोर्ड स्थापना तथा सञ्चालनसम्बन्धी विधेयक अघि बढाइएको छ ।

यसैगरी विपद् जोखिम न्यूनीकरण, प्रदेश आपत्कालीन कार्यसञ्चालन केन्द्र, लैङ्गिक समानता तथा सामाजिक समावेशीकरण परीक्षण, लोककल्याणकारी विज्ञापन वितरण, घर बिमा तथा कृषि र सहकारी कार्यक्रम सञ्चालनसम्बन्धी छवटा कार्यविधि स्वीकृत गरिएको छ । कार्यस्थलमा हुने यौनजन्य दुर्व्यवहार निवारण र प्रदेश आयोजनाको बहुवर्षीय ठेक्का सहमतिसम्बन्धी दुईवटा निर्देशिका पनि स्वीकृत भएका छन् ।

शासकीय सुधारतर्फ विभिन्न तालिम केन्द्रलाई एकीकृत गरी कर्णाली प्रदेश प्रशिक्षण प्रतिष्ठान स्थापना गरिएको सरकारले जनाएको छ । मुख्यमन्त्री, मन्त्री, प्रमुख सचिव, प्रदेश सचिव र कार्यालय प्रमुखबीच कार्यसम्पादन सम्झौता गरिएको छ । सरकारी कामकाजलाई प्रविधिमैत्री बनाउन एकीकृत सरकारी कार्यालय व्यवस्थापन प्रणाली (जीआईओएमएस) लागू गरिएको छ ।

यातायात व्यवस्था कार्यालय सुर्खेतमा एकद्वार सेवा सुरु गरी सवारी दर्ता, नवीकरण र राजस्व भुक्तानीलाई अनलाइन प्रणालीमा आबद्ध गरिएको छ । स्थानीय सेवाका कर्मचारीको पदपूर्ति, बढुवा र पदस्थापन प्रक्रिया पनि अघि बढाइएको छ ।

पूर्वाधार विकासतर्फ दुईवटा पक्की सडक पुल र १७ वटा झोलुङ्गे पुल निर्माण सम्पन्न भएका छन् । जाजरकोटको बारेकोट गाउँपालिकास्थित सेपुखोला र रुकुम पश्चिमको बाँफिकोट गाउँपालिकास्थित ताल्चा खोलामा सडक पुल निर्माण गरिएको हो । विभिन्न प्रहरी भवन निर्माणका लागि सात करोड छ लाख ५० हजार रुपियाँ निकासा गरिएको छ ।

रुकुम पश्चिमको शीतलपोखरी–झुल्खेत–चुनबाङ सडकको १८.४१७ किलोमिटर खण्ड निर्माण सुरु भएको छ । सुर्खेत रिङरोड, जुम्लाको खलङ्गा–लासी, हुम्लाको सलीसल्ला–पिप्लाङ र जाजरकोटको वाडाबन–सानाखोला सडक स्तरोन्नतिका लागि विश्व बैङ्कबाट कार्यसहमति प्राप्त भएको सरकारले जनाएको छ ।

जाजरकोट भूकम्पपछिको पुनर्निर्माणअन्तर्गत तीनवटा विद्यालय भवन निर्माण सम्पन्न भएका छन् भने प्रदेशको एकीकृत प्रशासनिक भवन निर्माण पनि सुरु भएको छ ।

विपद् व्यवस्थापनतर्फ रसुवाको भोटेकोशी बाढी प्रभावितका लागि प्रधानमन्त्री दैवी प्रकोप राहत कोषमा दुई करोड रुपियाँ उपलब्ध गराइएको छ । कर्णालीका १० जिल्लामा शव ढुवानी तथा किरिया खर्चका लागि प्रतिजिल्ला १५ लाख र राहत तथा उद्धार सामग्री खरिदका लागि २० लाख रुपियाँ पठाइएको छ । वन्यजन्तुबाट क्षति व्यहोरेका ५८ जनालाई १३ लाख ५८ हजार रुपियाँ राहत वितरण गरिएको छ ।

शिक्षा, स्वास्थ्य र खेलकुदतर्फ दशौँ राष्ट्रिय खेलकुद प्रतियोगिता मङ्सिर १६ गते उद्घाटन गर्ने मिति तय गरिएको छ । सुर्खेत रङ्गशालाको निर्माण सम्पन्न भई हस्तान्तरण प्रक्रिया अघि बढेको छ । राष्ट्रिय तथा अन्तर्राष्ट्रिय प्रतियोगितामा पदक जितेका १४६ जना खेलाडीलाई पुरस्कार प्रदान गरिएको छ ।

दैलेखमा पाँच शय्याको डायलासिस सेवा सञ्चालन गर्न अनुमति दिइएको छ । सल्यानको दार्मामा फैलिएको स्क्रब टाइफस नियन्त्रणका लागि परीक्षण किट, औषधि र चिकित्सक परिचालन गरिएको सरकारले जनाएको छ ।

सरकारले सार्वजनिक गरेको विवरणअनुसार असोज मसान्तसम्म चालु खर्च १२.२४ प्रतिशत र पुँजीगत खर्च ३.९३ प्रतिशत भएको छ । समग्र बजेट खर्च भने ७.२० प्रतिशत रहेको छ । यसै अवधिमा असोज २० गतेसम्म २४ करोड २७ लाख ७४ हजार ९२ रुपियाँ राजस्व सङ्कलन भएको छ ।

यस अवधिमा छवटा प्रारम्भिक वातावरणीय परीक्षण, दुईवटा कार्यक्षेत्रगत सर्त र एउटा वातावरणीय प्रभाव मूल्याङ्कनसमेत स्वीकृत गरिएको मुख्यमन्त्री शाहीले जानकारी दिनुभयो ।

नेपाली कांग्रेस सल्यानको देउवा पक्षको सभापतिमा चन्द सर्वसम्मत

नेपाली कांग्रेस सल्यानको १५औँ जिल्ला अधिवेशनबाट दीपकजंग चन्द जिल्ला सभापतिमा सर्वसम्मत चयन हुनुभएको छ ।नेपाली कांग्रेसको देउवा पक्षले सल्यानको

नेपाली कम्युनिस्ट पार्टी दार्माको समीक्षात्मक बैठक सम्पन्न

नेपाली कम्युनिस्ट पार्टी दार्मा गाउँ कमिटीको आयोजनामा फारुलाचौरमा समीक्षात्मक बैठक सम्पन्न भएको छ ।दार्मा गाउँपालिका अध्यक्ष दुर्गा मल्लको

रास्वपाको दार्मामा पालिका कार्यालय उद्घाटन

राष्ट्रिय स्वतन्त्र पार्टी (रास्वपा) दार्मा गाउँपालिकाले फारुलाचौरमा पार्टीको पालिका कार्यालय उद्घाटन गरेको छ। पार्टीका प्रतिनिधिसभा सदस्य रमेश